Vopnaskak einherja og augnabliks á laugardag

Bjartur Aðalbjörnsson skrifar:

Vopnfirskt sumar nær vissu hámarki um helgina þegar Vopnaskak verður haldið hátíðlegt. Mikið er um að vera og eins og vaninn er leikur meistaraflokkur karla heima þessa helgi. Gestirnir þetta árið eru Augnabliksmenn úr Kópavogi. 

​Gengi Einherja hefur rokkað nokkuð í sumar og eru nú í sjötta sæti með þrettán stig. 

Liðið hefur aðeins leikið þrisvar á heimavelli og náð í fjögur stig úr þeim leikjum. Hinsvegar hafa drengirnir unnið síðustu þrjá útileiki og þarf það að teljast óvenjulegt miðað við að í fyrra náði liðið aðeins í fjögur stig á útivelli allt sumarið.

Leikur helgarinnar er gríðarlega mikilvægur en Augnablik situr í tíunda sæti með sex stig. Við viljum að sjálfsögðu sjá stappfullan völl þar sem drengirnir verða öskraðir áfram til sigurs. Sumarstemningin mun ráða ríkjum þar sem grillað verður bæði fyrir leik og í hálfleik. Við hvetjum því fólk til að mæta snemma á völlinn en leikurinn hefst kl. 14.

Að leik loknum, klukkan fjögur, verður Einherji með sölubás á markaðstorgi niður í bæ þar sem ýmiskonar varningur verður til sölu.

Ýmiskonar Einherjavarningur verður til sölu á laugardag - m.a. gamlir búningar