Markmið félagsins með tilkomu siðareglna (code of ethics) er að veita þeim sem koma að íþróttum almennar leiðbeiningar í leik og starfi auk þess að vera hvatning.  Þær eru hluti af þeim anda sem á að vera ríkjandi í félaginu og þurfa að njóta almenns stuðnings meðal félagsmanna. Siðareglur skulu vera hvetjandi og leiðbeinandi í senn og kynntar öllum félagsmönnum. PDF-skjal með reglunum má finna hér.
​
​Foreldri/forráðamaður, hafðu ávallt hugfast að:

• Barnið þitt er í íþróttum á eigin forsendum ekki þínum.
• Hvetja barnið þitt til að fara eftir og virða reglur íþróttanna og að leysa deilur án fjandskapar eða ofbeldis.
• Styðja og hvetja öll börn og ungmenni - ekki bara þín eigin.
• Vera jákvæður, bæði þegar vel gengur og þegar illa gengur.
• Gera aldrei grín að barni eða hrópa að því ef það gerir mistök.
• Börn læra mest af því að framkvæma. Lærðu að meta góða frammistöðu allra barna í hópnum.
• Læra að meta þátttöku sjálboðaliða hjá félaginu því án þeirra hefði barn þitt ekki möguleika á að stunda æfingar og keppni með félaginu.
• Virða rétt hvers barns, óháð kyni, kynstofni eða trúarbrögðum.
• Láta vita ef barnið mætir ekki á æfingu eða í keppni.

​Iðkandi (yngri) af virðingu við sjálfan/n þig og félagið þitt skaltu hafa í huga að:
​

• Gera alltaf þitt besta og taka þátt af þínum forsendum.
• Virða alltaf reglur og venjur félagsins og sýna ávallt heiðarleika í íþróttum.
• Sýna öllum iðkendum virðingu, jafnt samherjum sem mótherjum.
• Deila ekki við dómarann.
• Koma fram við aðra eins og þú vilt að aðrir komi fram við þig.
• Vera ávallt stundvís á æfingar og keppni.

Iðkandi (eldri) af virðingu við sjálfan/n þig og félagið þitt skaltu hafa í huga að:

• Gera alltaf þitt besta.
• Sýna ávallt öðrum virðingu, jafnt í meðbyr sem mótbyr.
• Gera sér grein fyrir hlutverki sínu sem fyrirmyndir, innan vallar sem utan.
• Bera sjálf/ur höfðuábyrgð á framförum þínum og þroska.
• Virða alltaf ákvarðanir dómara og annara starfsmanna leiksins.
• Bera virðingu fyrir hæfileikum og getu annarra óháð kyni, kynþætti, stjórnmálaskoðunum, trúarbrögðum og kynhneigð.
• Forðast neikvæð ummæli eða skammir.
• Sýna hvorki né samþykkja ógnandi eða ofbeldisfulla tilburði.
• Vera heiðarlegur og opin/n í samvinnu við þjálfara og alla þá sem styðja þig.
• Láta vita ef þú mætir ekki á æfingu eða í keppni.
• Vinna gegn fordómum, einelti og kynþáttarníð
• Neyta aldrei ólöglegra lyfja eða vímuefna sem gætu haft áhrif á árangur þinn.

Þjálfari gegnir mikilvægu hlutverki innan félagsins og þarf að hafa í huga að:

• Koma fram við alla iðkendur á einstaklingsgrunni og á þeirra eigin forsendum.
• Styrkja jákvæða hegðun og framkomu.
• Þjálfun og keppni sé við hæfi iðkenda.
• Vera meðvitaðir um hlutverk sitt sem fyrirmynd, innan sem utan vallar.
• Setja ávallt heilsu, heilbrigði og öryggi iðkenda í fyrsta sæti.
• Sýna aldrei eða leyfa ógnandi eða ofbeldisfulla tilburði.
• Virða alltaf reglur og venjur og sýna heiðarleika í íþróttum.
• Viðurkenna og sýna virðingu þeim ákvörðunum sem dómarar taka.
• Koma eins fram við alla iðkendur og mismuna engum á grundvelli kyns, kynþáttar, kynhneigðar, aldurs, fötlunar, þjóðernis, trúarbragða eða skoðanna.
• Tala alltaf gegn notkun ólöglegra lyfja, áfengis, fíkniefna og tóbaks.
• Forðast samskipti við iðkendur í gegnum síma og netið nema til boðunar æfinga og upplýsingagjafar.
• Öll samskipti við iðkanda á samfélagsmiðlum skulu fara fram í hópsamtölum/hópsíðum sem foreldrar hafa aðgang að.
• Aldrei eiga í samksiptum við iðkanda með kynferðislegum undirtóni eða vísa í eitthvað slíkt.
• Taka ekki að þér akstur iðkenda, hvorki á æfingar né keppni nema með samþykki foreldra.
• Vera ávallt til fyrirmyndar í hegðun og framkomu, bæði innan sem utan vallar.  

Stjórnarmaður/starfsmaður hefur það hlutverk að:

• Standa vörð um siðareglur og gildi félagsins og sjá um að hvorttveggja lifi áfram meðal félagsmanna.
• Koma eins fram við alla sem jafningja og mismuna ekki iðkendum, þjálfurum eða foreldrum á grundvelli kyns, kynþáttar, kynhneigðar, aldurs, þjóðernis, fötlunar, túarbragða eða skoðanna.
• Virða alltaf reglur og venjur og sýna ávallt heiðarleika í framkomu og starfi.
• Hafa lýðræðisleg vinnubrögð í heiðri.
• Halda félagsmönnum vel upplýstum.
• Taka alvarlega þá ábyrgð sem þú hefur gagnvart félaginu og iðkendum.
• Hafa ávallt í huga að í félaginu er verið að byggja upp fólk.
• Reka félagið ávallt eftir löglegum og ábyrgum reikningsaðferðum.
• Notfæra aldrei stöðu þína hjá félaginu til eigin framdráttar á kostnað félagsins. 
• Vera ávallt til fyrirmyndar varðandi hegðun og framkomu, bæði innan félags og utan.

Hjarta félagsins eru stuðningsmenn og sjálfboðaliðar, þú sem fulltrúi félagsins þarft að hafa eftirfarandi í huga:

• Eitt mikilvægasta hlutverk þitt er að hvetja og hrósa.
• Forðastu niðrandi ummæli í garð andstæðinga og samherja, jafnt stuðningsmanna sem og leikmenn og þjálfara.
• Forðastu neikvæða hegðun á kappleikjum, mundu að þú ert mikilvæg fyrirmynd félagsmanna og slæm hegðun þín getur skaðað ímynd félagsins alls.
• Berðu ávallt virðingu fyrir störfum dómara og þjálfara liðsins.

• Stuðningsmanni ber ávallt að standa vörð um gildi félagsins jafnt utan vallar sem innan. ​