<![CDATA[Ungmennafélagið Einherji | Stofnað 1929

<![CDATA[Ungmennafélagið Einherji | Stofnað 1929 - Fréttir]]>Sun, 28 Jul 2024 10:32:30 +0000Weebly<![CDATA[Leikmaður Einherja lést af slysförum]]>Wed, 06 Sep 2023 13:50:52 GMThttps://www.einherji.net/frettir/leikmaur-einherja-lest-af-slysforum

Það er með djúpri sorg í hjarta sem við tilkynnum um sviplegt fráfall leikmanns okkar, liðsfélaga og vinkonu, Violetu Mitul sem lést af slysförum aðfaranótt 4. september, aðeins 26 ára gömul. Samfélagið á Vopnafirði er harmi slegið.

Violeta, sem fæddist 3. apríl 1997 í Moldóvu, gekk til liðs við Einherja í vor og gegndi lykilhlutverki í liði meistaraflokks kvenna í sumar. Violeta var góðhjörtuð, dugleg og brosmild. Hún var traustur liðsmaður og fyrirmyndar fótboltakona. Andlát hennar er okkur öllum mikið áfall og skarðið sem hún skilur eftir sig stórt. Hugur okkar er hjá liðsfélögum hennar og þjálfurum sem syrgja traustan Einherja.

Fjölskyldu Violetu, þeim Alexandru, Mariu, Veaceslav og Juliu sendum við okkar dýpstu samúðarkveðjur. Á svo hörmulegri stundu eru engin orð eða gjörðir sem græða sárið sem missirinn skilur eftir sig en við munum gera það sem í okkar valdi stendur til að létta undir með fjölskyldu og vinum sem eiga um sárt að binda á þessum sorgartímum.

Söfnunarreikningur fyrir fjölskyldu Violetu hefur verið stofnaður í nafni félagsins:

610678-0259
0178-05-000594

Ungmennafélagið Einherji

]]><![CDATA[meistaraflokkur karla hættir keppni]]>Fri, 03 Feb 2023 10:42:50 GMThttps://www.einherji.net/frettir/meistaraflokkur-karla-haettir-keppni

Kæru Einherjar

Við í stjórn Einherja þurfum því miður að tilkynna ykkur að ekki verður hægt að tefla fram liði í mfl karla sumarið 2023. Ástæðan er einfaldlega sú að ekki var nægur mannskapur. Eftir miklar vangaveltur og tilraunir til að leysa þessi mál var þetta niðurstaðan . Okkur þykir það mjög leitt en að sama skapi að þá þurfum við að hugsa um hag Ungmennafélagsins Einherja og teljum við þetta það eina rétta.

Við munum hins vegar tefla fram meistaraflokki kvenna og er verið að vinna að því að ráða þjálfara. Vonandi getum við tilkynnt um það á allra næstu dögum. Við munum að sjálfsögðu leggja metnað í það starf líkt og undanfarin ár.

Einnig erum við að vonast til að geta ráðið inn þjálfara fyrir yngri flokka. Yngri flokka starfið hefur gengið mjög vel og hefur orðið töluverð fjölgun á iðkendum í vetur. Það er okkar markmið að reyna fá meiri festu í yngriflokkastarfið og halda áfram því góða starfi sem unnið hefur verið.

Við erum bjartsýn á framtíðina þrátt fyrir þessar erfiðu fréttir varðandi mfl. karla. Við vonandi getum komið með jákvæðar fréttir varðandi þjálfaramál sem allra fyrst.

Stjórn Umf. Einherja

]]><![CDATA[Aðalfundur 23. nóvember]]>Wed, 09 Nov 2022 13:26:30 GMThttps://www.einherji.net/frettir/aalfundur-23-november

Stjórn Ungmennafélagsins Einherja boðar til aðalfundar félagsins 23. nóvember, klukkan 19:30 í vallarhúsi.

Mikilvægt er að félagsfólk fjölmenni á fundinn.

]]><![CDATA[Fundargerð aðalfundar]]>Thu, 10 Mar 2022 10:54:20 GMThttps://www.einherji.net/frettir/fundargerd-adalfundar

Fámennt en góðmennt

Aðalfundur var haldinn í vallarhúsi í gærkvöldi. Mæting var ekki merkileg en fundurinn var góður. Fundargerð:

Aðalfundur Ungmennafélagsins Einherja haldinn í vallarhúsi
Miðvikudaginn 9.3. 2022 kl. 19:30

Mættir: Bjartur Aðalbjörnsson, Aðalbjörn Björnsson, Hrafnhildur Helgadóttir, Arnar Ingólfsson, Svava Birna Stefánsdóttir, Linda Björk Stefánsdóttir, Ragnar Antonsson og Einar Björn Kristbergsson.
Dagskrá:

1. Formaður setur fundinn
Bjartur, formaður Einherja, setur fundinn og býður fundargesti velkomna.

2. Kosning fundarstjóra og fundarritara
Bjartur leggur til að Aðalbjörn taki að sér fundarstjórn og Arnar störf fundarritara. Það er samþykkt samhljóða.

3. Skýrsla stjórnar
Formaður fer yfir skýrslu stjórnar um starfsemi félagsins frá síðasta aðalfundi. M.a. fór hann yfir ráðningar þjálfara fyrir sumarið og gengi beggja meistaraflokka, þau mót sem yngri flokkar fóru á og gengi þeirra. Þá ræddi hann þá fækkun sem orðið hefur í yngri flokkum sem rekja megi meðal annars til rótleysis í þjálfaramálum og fólksfækkun í samfélaginu.

4. Reikningar félagsins lagðir fram til samþykktar
Bjartur fer yfir reikninga fyrir árin 2020 og 2021 en þeir höfðu ekki verið tilbúnir til samþykktar á síðasta fundi. Hvoru tveggja tekjur og útgjöld jukust talsvert milli áranna 2020 og 2021. Árið 2020 var tap upp á u.þ.b. 1,5 milljónir. Árið 2021 var hinsvegar rekstrarafgangur upp á u.þ.b. 400 þúsund krónur. Reikningar fyrir árið 2020 voru samþykktir samhljóða. Reikningar fyrir árið 2021 voru einnig samþykktir samhljóða.

5. Lagabreytingar
Formaður leggur fram nokkrar breytingar á lögum Einherja.

Tillaga um að breytingu á 1.gr. Þar sem U.M.F. Einherji er breytt í Umf. Einherji vegna málfræðireglna er samþykkt samhljóða.

Tillaga um breytingu á 3.gr laganna sem snýr að litum félagins og merki er samþykkt með öllum greiddum atkvæðum en einn situr hjá.

Tillaga um breytingu á 5.gr sem snýr að því að undanskilja heiðursfélaga frá greiðslu árgjalds er samþykkt samhljóða.

Tillaga um breytingu á 7.gr. Þess efnis að aðalfundur sé löglegur sé löglega til hans boðað er samþykkt samhljóða.

Tillaga um að bæta greinum 22 og 23 inn í lögin samþykkt samhljóða. Greinarnar snúa að veitingu heiðursmerkja félagsins.

6. Kosning stjórnar
Arnar Ingólfsson hyggst hætta í stjórn. Bjartur Aðalbjörnsson, Hrafnhildur Helgadóttir og Dagný Steindórsdóttir gefa áfram kost á sér og þá gefur Víglundur Páll Einarsson kost á sér en hann var áður varamaður. Enginn fundargestur gaf kost á sér í stjórn. Rætt var um mögulegar lausnir á því að einn aðila vanti til að mynda fullgilda stjórn. Formaður gerir það að tillögu sinni að þessir fjórir aðilar verði kosnir og skipað að finna fimmta aðila í stjórn. Þá verði boðað til aukaaðalfundar eigi síðar en 1. maí. Fundarstjóri ber þessa tillögu undir fundinn til samþykktar. Tillagan er samþykkt samhljóða.

Aðalbjörn Björnsson gefur kost á sér áfram sem varamaður. Enginn annar fundargestur gefur kost á sér í það starf.

Fundarstjóri les upp nýja stjórn og leitar samþykkis fundarins vegna kosningar stjórnar. Kosningin er samþykkt samhljóða.

7. Önnur mál.
Formaður segir frá nýskipuðu meistaraflokksráði kvenna. Það skipa Linda Björk Stefánsdóttir, Matthildur Ósk Óskarsdóttir og Berglind Steindórsdóttir. Ákveðið var að fara ekki í myndun sambærilegs ráðs fyrir meistaraflokk karla en það verði skoðað síðar hvort þörf sé á því.

Þá segir hann frá því að yngriflokkaráð hafi verið endurvakið. Það skipa Sandra Konráðsdóttir, Víglundur Páll Einarsson, Bylgja Dögg Sigurbjörnsdóttir og Berglind Ósk Wiium. Svava Birna leggur fram fyrirspurn þess efnis hvort yngriflokkaráð sjái um málefni flokka bæði í knattspyrnu og í blaki. Formaður svarar því að ekki sé gert ráð fyrir því í foreldrahandbók en að stjórn finnist eðlilegt að svo muni verða.

Svava Birna leggur þá spurningu fyrir stjórnina hvort hvort hún sé búin að hugsa um mögulegar lausnir til að auka áhuga barna á Vopnafirði á þátttöku í íþróttum og fjölga þannig iðkendum á nýjan leik. Bjartur fer yfir hvað stjórnin hefur rætt í þessum efnum, t.d. að hafa opna tíma í knattspyrnu þar sem allir geta mætt til að spila knattspyrnu. Einnig að stjórnin hafi rætt hvort breyta þurfi frá þvi formi sem er í dag og hætta að einblína á ákveðnar íþróttir eins og knattspyrnu og blak og frekar bjóða upp á fjölbreyttari íþróttaiðkun. Til þess að það gangi upp þurfi þó að finna réttan aðila til að sinna þjálfun, helst menntaðan íþróttafræðing.

Aðalbjörn segir það skipta höfuðmáli að réttur þjálfari sé fenginn í starfið til að endurvekja áhuga barnanna. Hann telur að staðan sé orðin þannig að sveitarfélagið ætti jafnvel að hafa beina aðkomu að málinu. Hann hvetur til þess að auglýsa tímanlega eftir þjálfara, t.d. fyrir næsta haust. Bjartur bendir á að í mjög langan tíma hafi starfið á Vopnafirði verið óvenju öflugt en það sé þó ekki ástæða til að nota það sem afsökun. Hins vegar hafi allt að 80% barna á staðnum verið iðkendur og sé það mjög há prósenta. Þá veltir hann því upp hvort breytt mynstur í samfélaginu hafi mögulega áhrif.

Dagskrá er tæmd. Fundarstjóri þakkar fyrir þátttökuna og slítur fundi.

Fleira gert og fundi slitið kl.20:20
Arnar Ingólfsson, fundarritari.

Frændurnir Aðalbjörn og Einar Björn ræða málin að fundi loknum

]]><![CDATA[Aðalfundur 9. mars]]>Mon, 07 Mar 2022 14:33:01 GMThttps://www.einherji.net/frettir/aalfundur-9-mars

Eins og áður hefur komið fram var áætlað að halda aðalfund félagsins miðvikudagskvöldið 23. febrúar. Vegna óvissu um Covid-smit var fundinum frestað um a.m.k. tvær vikur.

Nýr fundartími aðalfundar er miðvikudagskvöldið 9. mars kl. 19:30. Dagskrá er sú sama og venjulega:

1. Formaður setur fundinn.
2. Kosning fundarstjóra og fundarritara.
3. Skýrsla stjórnar.
4. Reikningar félagsins lagðir fram til samþykktar.
5. Lagabreytingar.
7. Kosning stjórnar.
8. Önnur mál.

Þau sem hafa áhuga á að bjóða sig fram í stjórn eru beðin um að setja sig í samband við Bjart.

]]><![CDATA[Aðalfundi frestað]]>Tue, 22 Feb 2022 16:33:55 GMThttps://www.einherji.net/frettir/aalfundi-fresta

Vegna hraðrar útbreiðslu Covid-smita í samfélaginu hefur stjórn Einherja tekið ákvörðun um að fresta aðalfundi félagsins um a.m.k. tvær vikur.

Nánari upplýsingar um fundartíma auglýst síðar. Félagar eru beðnir um að láta fréttirnar berast.

]]><![CDATA[Aðalfundur 23. febrúar]]>Mon, 07 Feb 2022 10:58:42 GMThttps://www.einherji.net/frettir/aalfundur-23-februar

Stjórn Einherja boðar félagsmenn sína hér með til aðalfundar í vallarhúsi félagsins miðvikudagskvöldið 23. febrúar kl. 19:30.

Ljóst er að breytingar verða á stjórn félagsins og eru þau sem áhuga hafa á að setjast í nýja stjórn beðin um að hafa samband við Bjart, formann.

Dagskrá fundarins er hefðbundin:

1. Formaður setur fundinn.
2. Kosning fundarstjóra og fundarritara.
3. Skýrsla stjórnar.
4. Reikningar félagsins lagðir fram til samþykktar.
5. Lagabreytingar.
7. Kosning stjórnar.
8. Önnur mál.

Tillögur að lagabreytingum þurfa að hafa borist stjórn tveimur sólarhringum fyrir fund. Vonumst til að sjá sem flesta!

]]><![CDATA[Jólapistill formanns]]>Sat, 18 Dec 2021 16:59:03 GMThttps://www.einherji.net/frettir/jolapistill-formanns

17. júní 2021 - Mynd/UrðurSahr

Kæru Vopnfirðingar, stuðningsmenn okkar og velunnarar.

Árið 2021 var viðburðaríkt á margan hátt; á góðan og slæman – eins og gengur og gerist. Eftir þungan róður um miðjan vetur tókst okkur að skipa öfluga stjórn sem tók við stjórnun félagsins og þeim krefjandi verkefnum sem fylgdu.

Fyrsta verk var að taka ákvörðun um hvort tefla skyldi fram meistaraflokkum í karla- og kvennaflokki. Það var ekkert niðurneglt í þeim efnum og mikil vinna sem lá fyrir. Eftir að hafa kannað landslagið var tekin ákvörðun um að senda báða flokka til keppni. Hafa þurfti hraðar hendur og taka stórar og erfiðar ákvarðanir á stuttum tíma og þegar leið á sumarið enn erfiðari ákvarðanir. Finna þurfti íslenska og útlenda leikmenn, afla fjár, finna húsnæði fyrir þjálfara og leikmenn, græja samninga, rifta samningum, flytja húsgögn, kaupa húsgögn, græja internet, redda vinnufötum, redda æfingafötum, ráða nýja þjálfara, undirbúa leikdaga og ferðalög o.s.frv., o.s.frv. Allt gekk þetta nú upp þó mikið mæddi á stjórninni á köflum. Engin eftirsjá er af þeirri vinnu sem fólk lagði á sig; við lukum sumrinu og lögðum grunn að því næsta. Það er nefnilega af nógu að taka hjá Einherja en sem betur fer eigum við alltaf einhverja trausta sjálfboðaliða og styrktaraðila sem létta undir með okkur. En auðvitað má bæta við á öllum vígstöðvum.

Auk meistaraflokkana eigum við öflugan hóp yngri iðkenda sem sinntu sínum æfingum og keppnisferðalögum af heilindum og metnaði. Það er mikilvægt að halda vel utan um yngri flokkana okkar og því nauðsynlegt að foreldrar veiti félaginu aðhald og aðstoð við utanumhald flokkanna.

Stjórn Einherja vill – fyrir hönd félagsins – þakka sjálfboðaliðum og styrktaraðilum fyrir gott samstarf á árinu sem er að líða. Þá færum við þjálfurum okkar, í fótbolta og blaki; þeim Helga Snæ, Bri, Taryn, Jóni Orra, Kolev, Símoni, Ívari, Víglundi, Bjarneyju, Fanneyju og Matthildi okkar bestu þakkir fyrir ánægjulegt samstarf. Stjórn Einherja færir Sigurði Donys sérstakar þakkir fyrir hans áralanga metnaðarfulla starf fyrir félagið.

Leikmönnum viljum við þakka fyrir samverustundirnar og framlag þeirra til félagsins. Vonumst til að fá að njóta krafta sem flestra á komandi ári. Og stuðningsmenn okkar og aðrir velunnarar fá að sjálfsögðu góða kveðju fyrir að standa við bakið á okkur í blíðu og stríðu.

Stjórn Einherja óskar ofangreindum gleðilegra jóla og gæfu á komandi ári. Vopnfirðingum öllum, íþróttahreyfingunni og landsmönnum öllum færum við þá sömu kveðju.

Að lokum vill formaður þakka innilega þann hlýhug og velvilja sem honum var sýndur í veikindum sínum í haust. Þar sannaðist hversu góðir Einherjar eru.

Hlökkum til gleðilegra samskipta og samverustunda á komandi starfsári.

Gleðileg jólahátíð,
Bjartur Aðalbjörnsson,
formaður Umf. Einherja

]]><![CDATA[Fundargerð félagafundar 13. desember]]>Wed, 15 Dec 2021 14:57:29 GMThttps://www.einherji.net/frettir/fundarger-felagafundar-13-desember

Stjórn Einherja boðaði til opins fundar í vallarhúsi mánudagskvöldið 13. desember. Tilgangur fundarins var að upplýsa félaga um erfiða stöðu félagsins er kemur að því að manna trúnaðarstöður innan félagsins. Mæting var afspyrnu léleg en nokkrir höfðu boðað forföll. Ljóst er að gera þarf aðra tilraun til að virkja félagana og vekja þá til umhugsunar um verkefnið sem framundan er. Hér að neðan er fundagerð fundarins:

Félagafundur Ungmennafélagsins Einherja haldinn í vallarhúsi
Mánudaginn 13.12. 2021 kl. 19:30

Mættir: Bjartur Aðalbjörnsson, Arnar Ingólfsson, Hrafnhildur Helgadóttir, Magnús Róbertsson, Aðalbjörn Björnsson, Ragnar Antonsson og Einar Björn Kristbergsson.

Dagskrá:

1. Daglegur rekstur félagsins
Bjartur fer yfir starfsemi félagsins, fjármál, mönnun í trúnaðarstöður og virkni félaga. Erfitt hefur verið að manna stjórn félagsins. Bæði hefur stjórnin verið mönnuð á einstaklingum sem ekki hafa verið mjög viljugir í það og erfiðlega hefur gengið að fá fólk í störf í kringum félagið. Hægt var að ráða Bjart í starf framkvæmdastjóra í 6 mánuði en af mörgu var að taka auk þess sem veikindi hans hjálpuðu ekki til.

Reynt var að virkja fólk til sjálfboðavinnu í gegnum facebook-hópinn „Einherjar | liðsfólk.“ Gengið hefur ágætlega að manna verkefni á leikdegi en erfiðara í önnur verkefni eins og þrif á íbúðum o.þ.h. Erfitt hefur verið að manna yngriflokkaráð og virkja tengiliði yngri flokka.

Félagið stendur þrátt fyrir allt nokkuð vel fjárhagslega. Hallarekstur síðasta árs var um 1,5 milljónir. Útlit er fyrir að núverandi ár komi betur út. Mörg óvænt útgjöld komu upp eins og laun fleirri þjálfara en áætlað var. Traust innkoma hefur verið bæði vegna styrkja og fjáraflana. Bjartur telur upp helstu styrktaraðila og fer yfir stærstu fjáraflanir.

Mælendaskrá opnuð. Aðalbjörn spyr út í aðalfund. Aðalfundur átti að vera haldinn í nóvember en var frestað vegna Covid. Verður haldinn í janúar. Farið yfir leikmannamál í meistaraflokkum. Kvennaliðið er í ágætis málum en staðan er erfiðari hjá karlaliðinu. Aðalbjörn stingur upp á að fá einhverja í hlutastörf hjá félaginu. Umræða skapaðist um hvernig umhirðu á æfingagöllum væri háttað. Rætt var um vanda varðandi mönnun stjórnar og varðandi öll verkefni. Einar Björn minnir á Almannaheillaskrá Skattsins sem þýðir í grófum dráttum að styrktaraðilar geta fengið endurgreitt frá skattinum.

2. Kynning á nýjum búningum frá Errea
Bjartur sýnir fundarmönnum tillögur að nýjum búningatillögum frá Errea og fær skoðun fundarmanna á þeim.

Fleira gert og fundi slitið kl. 20:28
Arnar Ingólfsson, fundarritari.

]]><![CDATA[Opinn fundur mánudaginn 13. desember]]>Wed, 08 Dec 2021 13:49:34 GMThttps://www.einherji.net/frettir/opinn-fundur-manudaginn-13-desember

Stjórn Einherja boðar til opins fundar félagsmanna og velunnara Einherja, mánudagskvöldið 13. desember kl. 19:30 í vallarhúsi. Efni fundarins er starfsemi félagsins og fyrirhugaður aðalfundur.

Ákvað stjórn að fresta aðalfundi félagsins fram í janúar en halda fyrst fund til að ræða starf og framtíð félagsins. Erfðilega hefur gengið að fá fólk til sjálfboðavinnu fyrir félagið, hvort sem er í trúnaðarstörf eða tilfallandi vinnu.

Er það mat stjórnar að mikilvægt sé að kalla foreldra, leikmenn, stuðningsfólk og aðra velunnara til fundar til að ræða starfsemi og rekstur félagsins. Eins og stendur er stjórn Einherja undirmönnuð og ljóst er að eitthvað af núverandi stjórnarfólki mun ekki gefa kost á sér áfram.

Látið fundarboðið berast til allra sem tengsl hafa við félagið. Það er mikilvægt að taka umræðuna á þessum tímapunkti þar sem undirbúningur fyrir næsta sumar er í fullum gangi.

Fyrir hönd stjórnar,
Bjartur Aðalbjörnsson, formaður

]]>