Kótilettukvöld og leikmannakynning á föstudag

Bjartur Aðalbjörnsson skrifar:

Föstudagskvöldið 17. maí verður knattspyrnusumrinu á Vopnafirði formlega hrundið af stað. Þá gefst stuðningsmönnum Einherja tækifæri til að gæða sér á dýrindis kótilettum, elduðum á gamla mátann - í raspi, með vel bræddu smjöri, kartöflum, ​grænum baunum og rauðkáli og að ógleymdri rabarbarasultunni. Veislan verður í Miklagarði og verður húsið opnað kl. 19:30. Borðhald hefst kl. 20 og kostar 4500 krónur inn. Aldurstakmark er 16 ár. Hver aðgangsmiði gildir í happdrætti og fær einn heppinn afmælistreyju eða -peysu í vinning. Á dagskrá er kynning á leikmönnum meistaraflokks karla og spurningakeppni þar sem þemað er að sjálfsögðu Einherji. Barinn verður opinn fram eftir kvöldi og er þetta tilvalið tækifæri fyrir stuðningsmenn Einherja að gleðjast saman og hita upp fyrir fyrsta heimaleik sumarsins sem verður á laugardag.

Skráning er hjá Víglundi Páli á facebook eða í síma 858-1079 en skráningu lýkur á fimmtudag.