Einherjinn Þorsteinn valdimarsson

Bjartur Aðalbjörnsson skrifar:

Í tilefni 100 ára fullveldisafmælis Íslands og að 100 ár eru frá fæðingu Vopnfirðingsins, Þorsteins Valdimarssonar, skálds, var haldin menningarhátíð til minningar um hann í Miklagarði í dag.

Ungmennafélagið sá um kaffiveitingar að lokinni dagskrá og er því við hæfi að grúska í sameiginilegri sögu Einherja og Þorsteins. 

Þann 18. júlí árið 1943 hélt Íþróttafélagið Einherjar íþróttamót á Vesturdalsárbökkum í Vopnafirði. Jóhann Björnsson setti mótið með ræðu og Guttormur Sigurbjörnsson, íþróttakennari UÍA, var mótsstjóri og dómari. Keppendur voru um 40 talsins. 

Í Tímanum 21. september 1943 er sagt frá úrslitum mótsins. Þorsteinn Valdimarsson bar sigur úr býtum í þremur greinum en ekki er vitað hvort hann keppti í fleiri greinum. Hann vann 100 metra hlaup, stökk lengst í langstökki og kastaði kringlunni lengst í kringlukasti. 

Þorsteinn var greinilega mikill íþróttamaður og vonandi er hægt sé að grafa upp frekari heimildir um hans íþróttaiðkun með Einherja.