Drengirnir í 32-liða úrslit

Meistaraflokkur karla mætti Leikni Fáskrúðsfirði í annarri umferð Mjólkurbikarsins í gær. Þetta var heimaleikur Einherja en leikið var á Fellavelli vegna vallaraðstæðna á Vopnafirði.

Lítið var um færi í fyrri hálfleik en Leiknismenn voru þó hættulegri. Í seinni hálfleik unnu Einherjar á en leikurinn var í járnum fram á 76. mínútu þegar Einherji fékk aukaspyrnu utan við vítateig Leiknismanna. Jökull Steinn tók spyrnuna og skoraði glæsilega yfir vegg Leiknismanna. 

Lokamínúturnar voru æsispennandi þar sem Einherjar vörðust stíft sóknum Leiknismanna og bjargaði Oskars liðinu tvívegis með glæsivörslum. 

Lokatölur voru 1-0 og verður Einherji því í pottinum þegar dregið verður í 32-liða úrslit á mánudaginn kl. 12.