aUSTURLANDSSLAGURINN: Þrömmum Á HÉRAÐIÐ!

Úr leik Einherja og Hattar 1. júní 2014

Bjartur Aðalbjörnsson skrifar: 

Leikdagur er runninn upp. Þetta er enginn venjulegur leikdagur því í kvöld er nágrannaslagur á Fellavelli. Vopnfirðingar kljást við sameiginlegt lið Héraðsbúa og Seyðfirðinga - Hött/Hugin. Eins og allir vita hafa þessi lið mæst óteljandi sinnum í gegnum tíðina og baráttan alltaf hörð. Þetta er Austurlandsslagur 3. deildarinnar þar sem enginn leikmaður, þjálfari, stuðningsmaður eða stjórnarmaður getur hugsað sér að tapa.

Þessi þrjú lið léku fyrst saman í deild árið 1974 í H-riðli 3. deildar. Viðureignirnar hafa verið margar síðan - miseftirminnilegar. Síðast léku Einherji og Huginn saman í deild árið 2012. Leikurinn á Seyðisfirði tapaðist á dramatískan hátt 4-3 en leikurinn á Vopnafirði vannst 3-1 og bundu Einherjar með því enda á sigurgöngu Hugins það sumarið. Síðast léku Höttur og Einherji saman í deild árið 2014. Útileiknum lauk með 2-1 sigri Hattar en heimaleikurinn sem spilaður var 11. júní var alvöru grannaslagur. Þetta var fyrsti leikur Einherja á nýja vellinum og hart var barist. Þrjú rauð spjöld litu dagsins ljós - eitt á Einherja og tvö á Hött. Leiknum lauk með 1-1 jafntefli. 

Kæru stuðningsmenn. Í kvöld þurfa drengirnir á öllum ykkar stuðningi að halda. Þeir eru tilbúnir í slaginn en eru vopnfirskir stuðningsmenn tilbúnir að leggja land undir fót og þramma yfir á Hérað með Krossavíkurfjöll og heimavöllinn á bakinu? Færum heimavöllinn yfir til drengjanna - fjölmennum í Egilsstaði! Áfram Einherji!

Leikurinn hefst kl. 20:00.